قــــصة الكل يريد راس بصري

في ليله من ليالي السمر عند الفارس المشهور بنيه بن قرينيس الجربا
كان يتواجد الشاعر بصري الوضيحي , يسلي الشيخ بأشعاره الغزليه
, وقصصه ومغامراته العاطفيه .

الى أن قال هذه القصيده يتمنى فيها فرس بيضاء اللون اصيله
وعدة فارس مع سيف حاد , وان يلاقي بها مع قومه خيل الشعلان
وعليها الفارس المشهور الدريعي بن شعلان وابن عمه مجول .

يقول بصري وهو يتمنى :

ابا اتمنى كان هي بالتماني ::: صفرا صهاة اللون قـبّـا طليعي

وسروال تومان ومثل الشطاني ::: ومصقل ٍ مثل الثغب له لميعي

ابي ليا لحق الطلب له غواني ::: والخيل معها مجول ٍ والدريعي

أردها لعيون صافي الثماني ::: بيض النحور مهلكات الرضيعي

قدام شمر مثل زمل الصخاني ::: اللي يخلون المخالف يطيعي

قاله بنيه بس هذي منوتك؟ ابشر بها ..!!
وباكر حنّا غزو على الشعلان!

وكانت بين بنيه الجربا الملقب بالأشمل
وبين الدريعي بن شعلان الملقب براعي النخوه الوايليه
خلافات وضغائن واحقاد لاحصر لها ,
نتج عنها فيما بعد قتل الروله لبنيه الجربا سنة 1231هـ ,
قيل قتل بفتيل , وقيل عسف فرسه بقوه على فارسين
كانا يطردانه ويطلبان مبارزته فـتقنطرت به وطاحت فوقه
ونزلوا عليه وقتلوه.
والله العليم انهم قتلوه بفتيل لأن بنته تقول
ولا حصل عنده عركة ٍ تسمح البال!

وشيخ شمر في ذلك الوقت هو عمه فارس الجربا الذي تولى المشيخه
بعد اخوه الفارس العظيم مطلق الجربا(زقـّـام) سنة 1212هـ
الى ان توفي فارس سنة 1233هـ .

وفعلا ً غزى بنيه الجربا على الشعلان ومن معه من شمر
ومن ضمنهم بصري الوضيحي على الفرس اللي تمناها
اعطاها له بنيه ... وحقق له امنيته

وطبعا ً اللي يغزي مع فارس مثل الأشمل لابد انه يرجع بكسب
وان ماصار له كسب , يفكه عند احتكام المصيبه.

غزوا على الشعلان واخذوا منهم , وهو يلحقهم الطلب
عليه مجول والدريعي , مثل ماتمنى الوضيحي
على ماقالوا ؛ جاك يامهنا ماتمنى؟!

وصار بينهم الطراد , واستردت الروله اذودها المنهوبه
بعد قتال عنيف , وصار الطمع بركايب شمر!

وبصري الوضيحي , ماهو فارس , ونيته يوم قال القصيده
انه يسلي الشيخ .
وهو رجال شاعر , ومزيون , ويقصد بهالبنات , وهويانات عليه
وكل يوم يجيب معه خويه ينبح له كلاب القطين!
ماله بسوالف الحرب والمغازي!

وصار الذبح بين الروله وشمر .. وبالمعترك ضرب طيب للدريعي
عجزوا عنه الرجال , ومثله بنيه بخيل شمر.

وهو يطرد الدريعي سربة الوضيحي .. ويصيح بهم راعي العليا دريعي!
وهو يلتفت بصري لخويه اللي بجنبه ينخاه .. مادري الا راس خويه مشلوع
ويشوف بعينه الراس يوم يطير!

وهو يسند التلعه! .. وهج بعمره .. العمر ياشامان!
وترك غزو شمر يقاتل ببساله.

وصل لربعه .. اول واحد طبعا ً

وهو منخرع , ينشدونه .. وش صار؟
قال وخذنا , ذبحوهم كلهم كلهم .. ماحد سلم ؟؟

قالوا فلان , قال ذبح
وفلان : ذبحوه
وفلان : اذبح
وفلان : اذبح

قال شايب جالس : ياجفا المحل( يعني يالمصيبه العظيمه!)
قال بصري : هذا انا شفته يوم تطير قـصبانه!!!!!!

ووصل بنيه والسالمين اللي معاه , بعد استبسال منهم
وقتال بطـولـي ..!

قال بنيه : هاتوا الوضيحي .. وهو يجي!
وهو ينزر عليه ويهاوشه , لأنه فشلهم وانحاش بعز المعركه وترك خوياه!
وشمر ماطلبت المنع , هاقين انهم يفكون الركايب!
والرجال بها ربح وتقاتل , هروبه ماكان مبرر.
ولكن هو ماله بهالسوالف , وبنيه بلاه بلوه

قال الوضيحي لبنيه يعتذر :

انا بلايه لابسين القطاني ::: اللي يخلون المخالف يطيعي

فوق قب ٍ مكرمات سماني ::: يشدن شياهين تخطـّـف مريعي

قال يالله رح اغـسـل الفرس اللي انت ركبتها بالصابون ,
سبع مرات بين شمر!

واظن ان سالفة ياجفا المحل , من الرواه يزودون , يعلقون عليه.
وشمر يقولون ان الفرس اللي راكبها الوضيحي
مدربها بنيه اذا قال : عنهم , توجهت للأعداء ..!
واذا قال : عليهم , رجعت , يعني العكس!

اذا صار الطراد للشمر ترجع به ورى ...
والناس تطارد قدام وهو فرسه تركض به ورى!
واذا صار الطراد للروله وشمر معطيه ظهورها .. توجهت به للروله!
ولكم ان تتخيلوا الوضيحي بهذا الشكل!

وطبعا ً هذي من زيادات الرواه للتندر ...

وقد جلا بصري عن شمر فيما بعد , وصار عند الشعلان
وفيهم يقول :
عند ابن شعلان ذرى كل مظيوم ::: لاجن كما وعل لجى بـالردامـي

والفريس اللي ثبتت بالقتال محد دري عنها وكل الناس تعرف الوضيحي؟!
رجال مبسوط ومستانس وغزل بهالبنات , وكل ليله وهو والكلاب خلني واخليك!

والله مامستانس الا اللي مثل الوضيحي والله يرحم الدريعي وبنيه

وانشاالله تكون اعجبتكم القصه